Praias

Llás

A praia de Llas é un precioso e longo areal de 760 metros de lonxitude. As súas dunas fana inconfundible. Pertence ao núcleo urbano, aínda que está un pouco máis afastada. É, se cabe, a elixida polos veciños e veciñas de Foz para gozar do sol e dar longos paseos acompañados pola suave brisa que mitiga os efectos do sol.

Esta praia consegue anualmente o galardón de Bandeira Azul, tamén conta con el este ano 2009.

Un grande paseo, que conta cun bonito parque no que os máis pequenos poden gozar, acompáñaa para achegarnos á seguinte praia, Peizás.

Peizás

A praia de Peizás pertence á parroquia de San Martiño, nela conxúganse as rochas e a area branca e fina. Haberá persoas que prefiran aproveitar as rochas para tomar o sol e outras que opten pola area. Esta praia ofrece as dúas posibilidades.

Tamén podemos aproveitar a súa área recreativa para comer comodamente.

Conta con diferentes servizos e co galardón de Bandeira Azul 2009, como vén sendo habitual.

Pampillosa

A praia da Pampillosa atópase na parroquia de Fazouro. Na súa marxe esquerda podemos observar a desembocadura do río Ouro.

É un areal tranquilo, con fina area branca e cun pequeno espazo de dunas. Conta cunha área recreativa, ideal para comer comodamente sen desprazarse.

Arealonga

A praia de Arealonga atópase na parroquia de Nois. Caracterízase pola súa lonxitude, 850 metros. Está encravada nunha fermosa paraxe, contando nun extremo co castro celta sobre acantilados e no outro extremo os acantilados de Mosteiro e a “Punta do Mógaro”.

En pouco tempo poderemos gozar dun fermoso paseo que a rodeará.

Polas

A praia de Polas atópase na parroquia de Nois, conta cun pequeno paseo que a rodea e como en anos anteriores coa distinción de Bandeira Azul 2009.

A súa area é branca e fina, como todas as praias do municipio. Se desexamos unha praia tranquila, esta pode ser unha grande opción.

Moi preto atopamos a praia de Xuncos.

Xuncos

A praia de Xuncos é un pequeno e abrigado areal situado na parroquia de Cangas que neste ano conta coa distinción de Bandeira Azul 2009.

A súa area é branca e fina e a súa ocupación adoita ser das máis baixas dos areais de Foz, polo que a converte nun dos máis tranquilos e sosegados.

O seu ámbito é de gran beleza debido aos acantilados que a gornecen.

Alemáns

A praia de Alemáns atópase na parroquia de Cangas. O seu carácter é resgardado e tranquilo, idóneo para a práctica do nudismo.

A súa area é branca e fina e as súas augas tranquilas. Estando protexida por belos acantilados que a separan da súa veciña praia da Areoura.

Areoura

A praia da Areoura atopámola na parroquia de Cangas, no límite co municipio de Burela.

De grande beleza polos seus acantilados e rochas, podemos gozar de forma tranquila debido á ausencia de desnivel.

A súa area, como o resto das praias do municipio, é fina e branca.

Conta novamente co galardón de Bandeira Azul neste ano 2009, como outros anos.